對好多姐姐嚟講，三哥，係佢哋第二個家；每日食飯，佢地都會輪流煮自己嘅拿手小菜，同姊妹們分甘同味。不過月圓佳節，佢哋嘅巧手當然留返畀屋企人。 三哥秉承傳統，中秋(9月21日)提早畀姐姐放工做節，全線分店*營業至下午4:00，下午3:30截單。想嘆三哥，記得早啲嚟啦。 *九龍塘又一城、九龍灣德福廣場及元朗形點分店照常營業
今日我哋喺沙田希爾頓中心分店繼續發揮「線」有善報精神，除咗一如以往，招待由聖雅各福群會 FOOD-CO 邀請嘅有需要人士享用米線外，更向佢哋派發應節禮品，包括水果、燈籠同餅乾，希望大家可以共度一個窩心佳節！中秋節快樂！
我哋繼續同聖雅各福群會 FOOD-CO 合作，將「線」心分享畀當區有需要人士，佢哋除咗可以免費享用米線外，仲會收到禮品包及首次派發嘅三哥氣球，真係滿載而歸呀！ 因為舉行活動，今日海禧華庭分店只做外賣，想食堂食嘅三粉就要稍移玉步到附近上水中心分店啦！ 想知下一站會唔會去你嗰區？記得緊貼我哋專頁啦！
無錯，就係「樂富」分店‼‼今日我哋繼續聯同聖雅各福群會 FOOD-CO ，將「線」意帶到樂富分店，分享畀有需要嘅基層人士。每個受惠街坊除咗免費食三哥米線，拎口罩或搓手液外，額外仲有多份小禮物拎添。咁開心都係為咗同大家一齊共渡疫情難關，食得開心先係最重要呀嘛！😋😋😋 雖然今日樂富匯富坊分店只做外賣，不過想食堂食嘅三粉又唔使擔心，搭一個站去黃大仙中心食三哥又得，去九龍塘又一城食都得！😎😎 少少距離係阻唔到三粉嘅「線」心 ~ 唔知下一站又會去邊到呢？記得留意我哋專頁啦！
即使今朝早掛住黑雨，都無阻三哥「線有善報」精神。雨過天晴後，下晝即聯同 聖雅各福群會 FOOD-CO 舉行慈善活動，為基層人士送上暖暖「線」意，可免費享用米線外，仲派發口罩、搓手液，撐住大家共同走過疫情。 多謝各位三粉熱心支持！三哥同一眾姐姐們會繼續延續「線有善報」精神至香港各社區，令有需要人士都感受到呢份「線」意。想知我哋下個月去邊區，記得留意譚仔三哥米線專頁啦！
三哥葵涌KCC分店星期日一向休業，但今日就坐無虛席，點解？因為今日係繼3月深水埗同4月觀塘之後，第三度舉行送贈米線活動嘅日子，招待由聖雅各福群會 FOOD-CO 安排嘅當區基層人士，免費享用米線！每位受惠人士更同時獲派發口罩或者搓手液，以協助佢哋走過疫情。 見到客人掛住滿足嘅笑容享用美食，我哋一班姐姐都好開心，為善最樂，呢句說話係真架！
社會上好多有需要人士，即使你同佢哋素不相識，只要肯踏出一步，都可以一「線」相連幫助佢哋。 三哥早前舉行「線有善報」慈善活動，以「您食一碗米線，三哥捐一碗米線」嘅形式號召全民一齊行善，結果成功吸引眾多熱心三粉支持。早前三哥就向聖雅各福群會 FOOD-CO 捐出60,000碗三餸米線嘅禮券，由佢哋轉送至110多間受惠慈善機構，為香港社區有需要人士送上絲絲暖意。 繼3月深水埗同4月觀塘之後，嚟緊幾個月我哋都會繼續去各區分店舉行送贈米線活動，想知多啲記得緊貼本版資訊啦 ！
三哥上月初喺深水埗新店招待300多位低收入人士免費享用米線，活動獲得極大迴響；為延續呢份「線有善報」精神，我哋決定由今個月起，每月揀選指定分店舉辦相同活動，為更多有需要人士送上絲絲暖意。 今日，呢份暖意就飄至觀塘晨光大廈分店，全日堂食都只會招待由聖雅各福群會 FOOD-CO 安排嘅基層人士，免費享用米線！所有受惠人士更同時獲贈口罩、搓手液或維他奶飲品，多謝 Diversey HK - Healthy Living 同 Vitasoy 維他奶 一齊共襄善舉！ 由於要進行以上活動，晨光大廈分店今日只做外賣，想堂食嘅話，可移玉步至電訊一代廣場分店。
今日三哥福榮街110號分店，除咗平時都有嘅辛辣香氣外，仲洋溢住一份愛心嘅味道！因為我哋全日堂食都只會招待由聖雅各福群會 FOOD-CO 安排嘅基層人士，免費享用米線！所有受惠人士更同時獲贈口罩兩個及維他奶一包，多謝 Vitasoy 維他奶 一齊共襄善舉！ 由於要進行以上活動，福榮街110號分店今日只做外賣，想堂食可以去隔籬107號店架。