三哥的社會活動

即使今朝早掛住黑雨，都無阻三哥「線有善報」精神。雨過天晴後，下晝即聯同 聖雅各福群會 FOOD-CO 舉行慈善活動，為基層人士送上暖暖「線」意，可免費享用米線外，仲派發口罩、搓手液，撐住大家共同走過疫情。 多謝各位三粉熱心支持！三哥同一眾姐姐們會繼續延續「線有善報」精神至香港各社區，令有需要人士都感受到呢份「線」意。想知我哋下個月去邊區，記得留意譚仔三哥米線專頁啦！

三哥葵涌KCC分店星期日一向休業，但今日就坐無虛席，點解？因為今日係繼3月深水埗同4月觀塘之後，第三度舉行送贈米線活動嘅日子，招待由聖雅各福群會 FOOD-CO 安排嘅當區基層人士，免費享用米線！每位受惠人士更同時獲派發口罩或者搓手液，以協助佢哋走過疫情。 見到客人掛住滿足嘅笑容享用美食，我哋一班姐姐都好開心，為善最樂，呢句說話係真架！

社會上好多有需要人士，即使你同佢哋素不相識，只要肯踏出一步，都可以一「線」相連幫助佢哋。 三哥早前舉行「線有善報」慈善活動，以「您食一碗米線，三哥捐一碗米線」嘅形式號召全民一齊行善，結果成功吸引眾多熱心三粉支持。早前三哥就向聖雅各福群會 FOOD-CO 捐出60,000碗三餸米線嘅禮券，由佢哋轉送至110多間受惠慈善機構，為香港社區有需要人士送上絲絲暖意。 繼3月深水埗同4月觀塘之後，嚟緊幾個月我哋都會繼續去各區分店舉行送贈米線活動，想知多啲記得緊貼本版資訊啦 ！

三哥上月初喺深水埗新店招待300多位低收入人士免費享用米線，活動獲得極大迴響；為延續呢份「線有善報」精神，我哋決定由今個月起，每月揀選指定分店舉辦相同活動，為更多有需要人士送上絲絲暖意。 今日，呢份暖意就飄至觀塘晨光大廈分店，全日堂食都只會招待由聖雅各福群會 FOOD-CO 安排嘅基層人士，免費享用米線！所有受惠人士更同時獲贈口罩、搓手液或維他奶飲品，多謝 Diversey HK - Healthy Living 同 Vitasoy 維他奶 一齊共襄善舉！ 由於要進行以上活動，晨光大廈分店今日只做外賣，想堂食嘅話，可移玉步至電訊一代廣場分店。

今日三哥福榮街110號分店，除咗平時都有嘅辛辣香氣外，仲洋溢住一份愛心嘅味道！因為我哋全日堂食都只會招待由聖雅各福群會 FOOD-CO 安排嘅基層人士，免費享用米線！所有受惠人士更同時獲贈口罩兩個及維他奶一包，多謝 Vitasoy 維他奶 一齊共襄善舉！ 由於要進行以上活動，福榮街110號分店今日只做外賣，想堂食可以去隔籬107號店架。

取諸社會、用諸社會，係三哥嘅品牌精神。有見過去一年，社會上唔少市民深受疫情影響，三哥決定新一年以「線有善報」活動作為起步，邀請全民一齊發揮三哥互助精神，幫助本地生活陷入困境嘅低收入人士。 嚟緊2月22日(星期一)，大家到三哥旗下任何分店惠顧一碗米線，我哋就會捐出一碗三餸米線畀聖雅各福群會 FOOD-CO，三哥期望透過今次活動捐出最少六萬碗米線 ，要達至呢個目標，你哋嘅參與不可或缺！所有參與是次善事嘅顧客，都會獲贈善報心意卡乙張同口罩乙個，記得一齊嚟共襄善舉啦！ * 顧客憑善報心意卡於3月份內惠顧三哥堂食或外賣自取兩餸或以上米線一碗，即可獲多送一餸優惠 * 口罩數量有限，送完即止

🌶新春將至，同大家拜個早年先🌶 🎉祝大家「辣到病除 身壯力健」，恭喜恭喜🎉 今年繼續秉承傳統，年三十晚除3間分店外全線休息一天，比姐姐哥哥可以同家人好好團圓。部份分店會提早年初一啟市，新年想食三哥就留意返喇！

繼早前嘅「創意香港·手作市場」之後，三哥再次力撐本地創作力量，贊助後日起開始舉行嘅「白紙市集 - 香城 2.0」！今次市集除咗雲集多位人氣插畫家同YouTuber外，三哥亦會親自擺攤，不過唔係賣野，係同各位三粉大玩姐姐話急口令！只要成功挑戰，就可以得到精美紀念品，記得嚟玩啦！

「原創・獨創」一向係三哥嘅品牌理念，今年我哋第二度贊助 LIFE Mart 手作市集舉辦「創意香港·手作市場」，攤檔租金由三哥全數贊助，希望藉此幫助一班本地手作人，共渡難關，繼續展示香港不同面貌同生活態度，令大家更熱愛這個地方！今年市集規模更大，將會喺兩個地點同時舉行！